الصدمة بتكون فى مجرد تصور الشئ إنما لما بشوفه بيتجسد أدامى وبيتحول لمثل وقيمة وأبتدى أتخيل وأعيش التجربة بلاقيها عادى فبجرب بقى على أرض الواقع وعادى برضو منا سبق وعشت ده واستمتعت بلذته فى الخيال أو الفيلم اللى شوفته (عن أثر أفلام العنف والانحطاط الأخلاقى والسبكى ومحمد رمضان أتحدث .. عن المخدرات اللى بتتباع على النواصى أتحدث) اللى وصلناله قضية أمن قومى فى المقام الأول .. بدل ما تعرض فيلم (عبده موته) اعرض مسلسل ( العائلة) .. بدل ما تعرض (توك شو) اعرض ( العلم والايمان) ..!!
صلح اعلامك وما يقدمه .. جدد الخطاب الدينى .. درِّس أخلاق فى المدارس .. قنِّن تجارة المخدرات .. رجَّع المسرح والمكتبة وحصص التربية الزراعية والاقتصاد المنزلى والتربية الفنية والتربية الوطنية والألعاب والتربية الموسيقية تانى للمدارس .. رجع طابور الصباح والاذاعة المدرسية وتحية العلم يا عم .. رجع مجموعات التقوية فى المدارس .. رجع الأخصائية الاجتماعية والنفسية للمدراس .. هات مستر محمد صلاح بتاع الانجليزى يدينا نص الحصة يسمع مشاكلنا الخاصة ويقولنا نعمل ايه .. هات أبلة إلهام شتية تدخل الفصول بين الحصص تكلمنا فى مشاكلنا وازاى نواجه ونحل ونفكر .. هات أبلة فوزية عطية وأبلة سامية عبد الحميد يشرحولنا الجغرافيا والتاريخ كأننا شايفين كل حاجة .. هات أ. عادل عيسى يشرحلنا العلوم فى الفصل كأننا راكبين سفينة الفضاء بجد .. هات أبلة عفاف مكين مدرسة المكتبة تعلمنا إزاى نقرأ ونناقش ونطرح قضية ونحلها .. هات أ. أحمد مخلوف يقف على باب المدرسة يدخل الطلبة الصبح ويعلمهم الإلتزام بالمواعيد وكأننا فى الجيش ويدور بين الحصص والفسحة وفى حوش المدرسة يشوف سلوكيات الطلبة والنهاره مش معدى اللى يلمحه بيعمل الغلط أو بيقل أدبه على زميله أو مُدرسه أو حتى تيجى شكوى من البيت إن الطالب ده عمل الغلط .. وأثناء تحية العلم يظبط الطابور العسكرى ونشيد (بلادى / بلادى لك حبى وفؤادى .. الولاد ايدهم تعظيم سلام والبنات كف ايدهم مفتوح على صدرهم وكل كلمة فى النشيد طالعة من القلب ترج الدنيا) النشيد ده لوحده زرع جوانا معنى كلمة وطن وانتماء واخلاص .. هاتلنا حد يعلمنا الحب والخير والسلام والتصالح النفسى ..!!
المعادلة الصح ابنى الانسان الأول عشان يعرف يدير الدولة اللى بتتبنى وإلا إحنا بنحرث فى البحر ..!!
إرسال تعليق